UGANDA....MASHOGA, WASAGAJI KUFUNGWA MAISHA

 

Muingereza David Cicil gerezani kwa madai ya tamthilia chafu

Uganda imepitisha mswada unaopinga mapenzi ya jinsia moja.

Iwapo Rais Yoweri Museveni ataidhinisha sheria hiyo inamaanisha atakayepatkana na hatia atahukumiwa kifungo cha maisha gerezani.
Mswaada huo uliopitishwa na bunge siku ya Ijumaa halikadhalika inasema mtu yeyote aliye na taarifa za watu wanoshiriki mapenzi ya jinsia moja na kushindwa kuripoti habari hizo kwa maafisa wa polisi atafungwa gerezeni maisha.
Wakati hu huo bunge hilo hilo la Uganda siku ya Alhamisi liliidhinisha mswaada unaopiga marufuku maonyesho ya picha za chafu.
Mswada huo unaharamisha kitu chochote kitakachoonyesha sehemu nyeti kama vile matiti, mapaja, makalio au tabia yoyote inayozua uchu wa mapenzi.
Kulingana na mswada huo, sheria iliyopo sasa kuhusu picha chafu haihusu zaidi picha hizo bali linahusu uchapishaji ,mawasiliano, taarifa , burudani, maonyesho katika kumbi za kuigizia, miziki inyochezwa katika vyombo vya habari, densi, sanaa, mitindo na picha za runinga.
Mapema mwaka huu Waziri wa maadili wa Uganda, Simon Lokodo, alipendekeza kuwa mwanamke yeyote anayevalia nguo ambayo inafika juu ya magoti anatakiwa kukamtwa na kuadhibiwa kisheria.
Mswada huo unahitaji kuidhinishwa na Rais kabla ya kufanywa sheria.
Uganda ni nchi inayoshikilia mawazo ya kihafidhina yaani isiyopendelea mageuzi katika mawazo na inaandaa sheria ya kuwaadhibu wanaoshiriki mapenzi ya jinsia moja ikijumuisha hukumu ya kifo katika baadhi ya kesi.

WAASI WAENDELEA KUUA WATU AFRIKA YA KATI....1000 WAPOTEZA MAISHA

 

Wanamgambo wa kundi la anti-balaka, Jamhuri ya Afrika ya Kati

Takriban watu elfu moja wameuawa na waasi wa zamani nchini Jamhuri ya Afrika ya Kati katika mapambano yaliyodumu kwa siku mbili yaliyojitokeza mwezi huu, makadirio haya yanazidi yale ya Umoja wa Mataifa. Shirika la Amnesty International limesema.

Shirika hilo limesema kuwa uhalifu wa kivita bado unaendelea kufanyika nchini humo.
Wapiganaji hao ambao wengi wao ni Waislamu walimuondoa madarakani aliyekuwa rais wa taifa hilo, Francois Bozize mwezi March, hali iliyosababisha mgogoro ndani ya jamii nchini humo.
Kiongozi wa waasi Michel Djotodia hivi sasa ni kiongozi wa kwanza kutoka jamii ya Waislamu anayeongoza taifa lenye Wakristo wengi na ndiye kiongozi wa mpito wa Jamhuri ya Afrika ya kati.
Katika ripoti hiyo, Amnesty International imesema waasi wa zamani wa Seleka waliwaua takriban watu 1000 mjini Bangui, kwa kile kinachoelezwa kuwa ni kulipa kisasi dhidi ya wapiganaji wa Kikristo wanaodaiwa kuwashambulia waasi wa Kiislam.
Idadi ya waliopoteza maisha imeelezwa kuongezeka kuliko ile iliyotolewa na Umoja wa Mataifa ambao ulisema watu 450 waliuawa mjini Bangui na wengine 150 sehemu nyingine nchini humo.
Mashambulio hayo yamekuja baada ya wanamgambo wajulikanao kwa jina la anti-balaka ambao walikuwa wakiingia kila nyumba na kuwaua watu 60 wa jamii ya Kiislamu. Amnesty International imeeleza.

Askari wa Ufaransa nchini Jamhuri ya Afrika ya Kati

Mashambulio yaliyofanywa na wanamgambo wa zamani wa Seleka yamehusisha mauaji pia uvamizi na uporaji katika nyumba za raia,ambapo wanawake na watoto kadhaa wameuawa.
Shirika hilo limesema kuwa raia huuawa kila siku mjini Bangui, ingawa kumekuwepo na vikosi vya Ufaransa na Umoja wa Afrika, Ufaransa ikiwa na askari 1,600 nchini humo.
Shirika la kutetea haki za binadamu la Human Rights Watch limesema wapiganaji wa Kikristo walishambulia jamii ya kiislamu kaskazini mwa mji wa Bossangoa na kuwachinja watoto huku wakiwashinikiza wazazi wao kushuhudia mauaji hayo.
Mwanzoni mwa mwezi huu, Rais Djotodia aliiambia redio ya Kifaransa kuwa yuko tayari kuzungumza na viongozi wa wanamgambo wa Kikristo ili kutatua mzozo huo.
Kauli hiyo imekuja baada ya Umoja wa Afrika kuidhinisha kuongeza vikosi vyake na kufikia askari 6,000.
Vikosi vya Umoja wa Afrika na vya Ufaransa vinafanya jitihada za kuwanyang'anya silaha wanamgambo hao.
 

Madaktari wauawa kwa shambulio Somalia

 

Moja ya majeruhi katika mlipuko uliotokea nchini Somalia

Madktari raia wa Syria na wa jamii ya kisomali wameuawa kwa kupigwa risasi baada ya kufanyika shambulizi karibu na mji mkuu wa Somalia, Mogadishu.

Mashuhuda wa tukio hilo wameiambia BBC kuwa watu wenye silaha walishambulia gari lililokua likielekea katika hospitali moja.
Walinzi wao wawili pia waliuawa katika shambulio hilo, huku daktari mmoja wa Syria na mwingine wa Somalia walijeruhiwa .
Wanamgambo wa kiislamu, Al Shabaab wamekuwa wakisabisha hali ya usalama kuzorota nchini Somalia, hata hivyo haijathibitika ni nani anayehusika na shambulio hilo.
Madaktari wa Syria wanaelezwa kuwa walikua nchini Somalia kwa ajili ya shughuli za kutoa misaada.
Mwandishi wa BBC ameripoti kuwa shambulio hilo lilitokea katika wilaya ya Siinka Dheer inayodhibitiwa na Serikali, eneo lililo kusini mwa Mogadishu.
Madaktari waliojeruhiwa wako hospitalini wakipatiwa matibabu mjini Mogadishu, halikadhalika miili ya Watu sita waliouawa katika shambulio hilo wamefikishwa hospitalini.
 

MANGARIBA 38 WAKAMATWA HUKO MOSHI MKOANI KILIMANJARO

 

Ukeketaji hufanywa katika sehemu nyingi Tanzania licha ya kuharamishwa

Maafisa wakuu mjini Moshi Mkoa wa Kilimanjaro wamewakamata wanawake 38 waliopatikana wakiwakeketa wasichana katika eneo hilo.

Haijulikani idadi ya wasichana waliokuwa wanakeketwa , lakini ripoti zinasema kuwa walikuwa kati ya umri wa miaka 3 na 16.
Ingawa ukeketaji ambao umeharamishwa huendelezwa katika sehemu nyingi za Mara na Dodoma nchini hapa nchini , hilo sio jambo la kawaida mjini Moshi.
Inaarifiwa wanawake hao walikamatwa Jumapili walipokuwa wanacheza dansi ya kitamaduni wakiwazingira wasichana ambao ndio walikuwa wamekeketwa tu.
Baadhi ya wasichana inaarifiwa bado walikuwa wanavuja damu na wengine wakiwa wanauguza majeraha.
Ukeketaji umeharamishwa hapa nchini tangu mwaka 1998 ingawa bado unaendelezwa katika baadhi ya sehemu mabalimbali za nchi.
Inakisiwa asilimia 15 ya wasichana pamoja na wanawake wamekeketwa hapa nchini.

WAJUE VIONGOZI WANAWAKE WANAOTIFUA KIVUMBI DUNIANI

 

Michelle Bachelet amechaguliwa kama Rais wa Chile kwa muhula wa pili na kumshinda mpinzani wake Evelyn Matthei kwa kura nyingi

Joyce Banda alichaguliwa kama Rais wa kwanza mwanamke Kusini mwa Afrika April 2012. Akawa rais wa Malawi alipomrithi mtangulizi wake aliyefariki kutokana na mshtuko wa moyo

Rais wa Liberia,Ellen Johnson Sirleaf, 72, alitajwa kama mmoja wa washindi wa tuzo ya amani ya Nobel mwaka 2011. Alichaguliwa kama Rais wa kwanza mwanamke barani Afrika mwaka 2005 miaka miwili baada ya kumalizika kwa vita vya wenyewe kwa wenyewe vya miaka 14 Liberia

Sheikh Hasina alichaguliwa kwma waziri mkuu wa kwanza wa Bangladesh kwa muhula wa pili mwezi Januari mwaka 2009. Lakini mwaka 2008 chama chake cha Awami, kilipata ushindi mkubwa dhidi ya mpinzani wake Begum Khaleda Zia.

Korea Kusini imemchagua rais wake wa kwanza mwanamke Park Geun-hye, kwenye uchaguzi uliokuwa na ushindani mkali Disemba mwaka 2012. Babake Park Chung-hee alitawala nchi hiyo kwa miaka 18

Waziri mkuu wa Thailand, ingluck Shinawatra dadake mdogo waziri mkuu aliyeondolewa mamlakani Thaksin Shinawatra, aliongoza chama chake cha upinzani kuweza kushinda uchaguzi uliofanyika Julai 2011.

Helle Thorning-Schmid alichaguliwa kama waziri mkuu wa kwanza mwanamke wa Denmark, baada ya chama chake kupata ushindi kwenye uchaguzi uliofanyika Septemba mwaka 2011. Thorming alikosolewa hivi karibuni kwa kujipiga picha na waziri mkuu wa Uingereza Cameron na Rais Barack Obama kwenye ibada maalum ya hayati Mandela

Dalia Grybauskaite alichaguliwa kama rais wa kwanza wa Lithuania katika uchaguzi mkuu wa Mei 2009. Alishinda kwa kura 69%

Chansela wa Ujerumani, Angela Merkel anajulikana kama kiongozi asiyekuwa na mbwe mbwe nyingi na kusababisha watu kumuita..Mutti..mama wa taifa. Markel anajiandaa kwa muhula wa tatu baada ya kushinda uchaguzi wa Septemba 22

Rais wa Argentina, Cristina Fernandez alishinda uchaguzi uliofanyika mwezi Oktoba mwaka 2007 ushindi ambao wengi walisema ulitokana na umaarufu wa mumewe aliyekuwa Rais Nestor Kirchner. 

Rais wa Brazil Dilma Rousseff alichaguliwa kama rais wa kwanza mwanamke nchini Brazil alipochukua hatamu za uongozi kutoka kwa Luiz Inacio Lula da Silva mwaka 2011. Alikuwa mkuu wa majeshi kabla ya kuteuliwa na kumrithi Rais De Silva

Kiongozi wa upinzani nchini Jamaica, Portia Simpson-Miller alishinda uchaguzi uliofanyika Disemba mwaka 2011 kwa idadi kubwa ya kura. Alikuwa waziri mkuu wa Jamaica kabla ya kushindwa kwenye uchaguzi wa mwaka 2007

Kamla Persad-Bissessar alichaguliwa kama waziri mkuu wa kwanza mwanamke wa Trinidad and Tobago, wakati chama chake kilishinda uchaguzi kwa idadi kubwa ya kura mwezi Mei mwaka 2010

Wananchi nchini Chile wamemchagua Michelle Bachelet kama rais wao kwa muhula wa pili.
Wananchi wa Chile wameendeleza kasi ya kuwachagua viongozi wanawake mtindo ambao unaendelea kukuwa katika mataifa ya kilatino.
Na hawa hapa ni baadhi ya wanawake ambao wako mamlakani duniani.